Luk 16 | AOJFILIFITA | STEP | EaꞋ Jisas naꞋipa alupumi ananimi naꞋi, “Anona aman amamaga hiamunai naoꞋwa anona ananinai numafi opeh ananimi nape. EaꞋ enis safiꞋmai anan sambasoꞋmana anan nandaꞋmana opehi ma basef saꞋi, ‘Numafi maol ineꞋimi anan nakwaha otamba hiami ineꞋimi mafeꞋ etin.’

c - Lu 16:15Mt 23:28Lu 18:9,14Pro 6:16,17

Luke 16

Basef womun etina anona aman gawainai numafi maoli

1 EaꞋ Jisas naꞋipa alupumi ananimi naꞋi, “Anona aman amamaga hiamunai naoꞋwa anona ananinai numafi opeh ananimi nape. EaꞋ enis safiꞋmai anan sambasoꞋmana anan nandaꞋmana opehi ma basef saꞋi, ‘Numafi maol ineꞋimi anan nakwaha otamba hiami ineꞋimi mafeꞋ etin.’

2 EaꞋ nofala aman anama numafi maoli nafiꞋi naꞋipana naꞋi, ‘DeiꞋ maina basef anama aeꞋ ameꞋama ineꞋ? IneꞋ nefeꞋ niamba amamaga aeꞋami mape lagel ineꞋinai newalapam. Ina ataꞋ nepe nimafi maol aeꞋanai wapotiꞋ, owaꞋ.’

3 EaꞋ numafi maoli okom natanea naꞋi, ‘AeꞋ nambimb ataꞋ endaꞋam iꞋimama? Dembinai naꞋi nigaloꞋme ma epe imafi maol deiꞋ. AeꞋ ina laꞋifiwi ma ewala etap. EaꞋ ambal aona indaila enis epesa gwaꞋaimi maim. 4 EaꞋ aeꞋ okom natanea ma anom amamaga eandaꞋama nambimb epes sofaꞋe efeꞋ ifagw asasimi ma nemaf anama dembinai nigaloꞋme ma maol anama deiꞋ andaꞋanai.’

5 EaꞋ nofala amam hiami atona etin wialef mataomami mafiꞋmai anan. Anona aman naliꞋ nafiꞋmanai nahaliꞋana naꞋi, ‘IneꞋ wialef maꞋum mapoma dembinai aeꞋanai?’

6 EaꞋ anan naꞋi, ‘Darep wel luꞋwami 100-peleim.’

EaꞋ naꞋipana naꞋi, ‘IneꞋ mehip nepe niti tiketa wiaf nendaꞋ amefa darep 50-peleim atom mil.’

7 EaꞋ anona nataga nahaliꞋana naꞋi, ‘Wialef ineꞋimi maꞋum?’

EaꞋ anan naꞋi, ‘Begah witim 100-peleim.’

EaꞋ naꞋipana naꞋi, ‘IneꞋ nefaꞋ tiket anama wiaf ineꞋinai nailanai eaꞋ nendaꞋ 80-peleim.’

8 EaꞋ aman dembinai nafela agela aman anama aonai numafi maoli. DeiꞋ main, anan nandaꞋ waf gawainai siꞋi aman nomonas mapeinai. Epes ukup asasimi maimaila amamaga maim mape etap anaeꞋ esis sandaꞋ maola waf gawainai siꞋi epes nomonas mapeisi sikilaꞋ epes sape howalagon owaꞋ segawa andeandeꞋi.”

9 EaꞋ Jisas naꞋi, “AeꞋ aꞋipipa ma moni wiga maim maꞋoh etap anaeꞋ, ipeꞋ pendaꞋ enis amam nematawa sotaga alupisi ipeꞋisi. EaꞋ iꞋi nemaf esis sohapila wiga monianai hiꞋilana, anona nemaf God nofaꞋepa pefeꞋ ifagw mape ilif heveni pepe andeandeꞋ laꞋelaꞋef hihif.

10 Emi egafis sumafi amamaga saꞋumi andeandeꞋ, anona nemaf sumafi amamaga luꞋwami andeandeꞋ wapotiꞋ. EaꞋ emi egafis sembasoꞋam, owaꞋ seandaꞋ maol andeandeꞋma amamaga saꞋusaꞋumi, anona nemaf esis ina sendaꞋ amamaga luꞋwami andeandeꞋ wapotiꞋ, owaꞋetin. 11 IꞋi ipeꞋ owaꞋ pimafi moni wiga maim mape etap anaeꞋ, anona nemaf emi neseꞋepa amamaga buꞋwami endilisi pimafiam? OwaꞋetin endilisi. 12 IꞋi ipeꞋ owaꞋ pimafi amamaga enis epesi, emi neseꞋepa amamaga ipeꞋimi atom pimafiam? OwaꞋetin.

13 Ina enin epen nandaꞋ maoli laꞋifin nihapila maol biefina amam dambami biam, owaꞋetin. NaꞋama okom nila anona, anona nesambalona. EaꞋ naꞋama etin ipeꞋ ina laꞋifipa pepe owina God noloma wigai moni wapotiꞋ, owaꞋ.”

Anom basef maꞋi miꞋuli Godi fowaꞋinai maloma epes siowis wambota Godi numafias

14 Amam Farisi mameꞋ basef amama hiami Jisas naꞋiami, amam mandaꞋmana salamal etin. DeiꞋ main, amam ukup maimaila moni atona. 15 EaꞋ anan naꞋipam naꞋi, “IpeꞋ pandaꞋ maol ma epes hiesi sitilipa siꞋi ipeꞋ epes buꞋupei. EaꞋ God nogawa ukup ipeꞋimi nomon. Amamaga epes safela agofami satalom otamba luꞋwami, amama falafumi atoma naep Godi. 16 Basef amam profet mawalipasami maloma basef mail miꞋuli God naseꞋ Mosesanai amama amam mawalipasam laꞋelaꞋef mape mafiꞋi metambel nogota Jon nataganai. EaꞋ nogota anama Joni nafiꞋi nataga deiꞋ basef buꞋwami ma epes siowis wambota Godi numafias, amama mape mafeꞋ mataga wambel hiagoma. EaꞋ epes hiesi laꞋifis sandaꞋ maol mehip ma sefeꞋ siowis wambota Godi numafias. 17 Anom basef tuꞋwanima ^{▼▼Niti futnot Matyu 5:18
,} ^{b
,} ^{c
,} ^{d
,} ^{e
,} ^f

amef saꞋusaꞋumi moloma anom basef bandami mail nomona buk miꞋuli Godi ina anona nemaf mefeꞋ higililam hiꞋilam, owaꞋetin. Mope laꞋelaꞋef hihif naꞋama etin. EaꞋ etap naloma otaga anona nemaf hegililam.

Jisas naꞋi basefa sawala waf daseꞋamainai

(Mt 5:31-35, 19:9; Mk 10:11-12)

18 Emi egalin nakwaha wauluꞋmana ananiꞋwi ma neaseꞋ anoꞋw nemataꞋw wapotiꞋ, anan nandaꞋ waf aonai soꞋa waola nemataꞋw akwama naliꞋ naseꞋakwi. EaꞋ emi egalin nasoꞋ anoꞋw nemataꞋw fowaꞋ anona aman nagaloꞋmakwi aman anama nagiꞋ naseꞋakwi wapotiꞋ nandaꞋ waf aonai soꞋa waola nemataꞋw akwama.

Anona aman amamaga hiamunai naloma Lasarus

19 Anona aman amamaga hiamunai nape. LaꞋelaꞋef anan nala siaogw buꞋwami atom luwaguf buꞋwami satalom otamba luꞋwami. EaꞋ nimeguf hiami nefaꞋ gwaꞋaimi buꞋwami atom nape andeandeꞋ endilisi. 20 EaꞋ felefeleꞋma ipat ananinai anona aman kwahunai nandailasa gwaꞋaimi moni maim nape, agilinama Lasarus. Alop ananinai siꞋina ma maselis. 21 Enis epes sofaꞋana safiꞋi naꞋoh felefeleꞋma ipat aman anamai. Anan naꞋi notatama gwaꞋaimi tukwakwanimi mowa maꞋoh tebol owinam aman anama amamaga hiamunai ma ataꞋ neaꞋam neaseꞋ opaf. EaꞋ nombagw mafiꞋi mapaloꞋmana maselis ananimi afegah amamumi.

22 Anom afagof mafeꞋma eaꞋ, aman anama falafunai nagaꞋ, eaꞋ anom ensel mofaꞋana mafeꞋ mahaponana nape wambel buꞋunai felefeleꞋma Abraham. EaꞋ aman anama amamaga hiamunai anan wapotiꞋ naga, sawana. 23 EaꞋ nafeꞋ wambel aonai hel nofaꞋ nimanimi luꞋwami. EaꞋ natologon nalata ilif, nati Abraham napani laogon endilisi, Lasarus nape nalomana. 24 EaꞋ nofalana naꞋi, ‘Ahalome Abraham, ineꞋ niti uwahipiwi nesapaꞋ Lasarus nufiꞋi nola faf ananinai tuꞋwanina atona embel nupihiꞋame afega aeꞋanai. AeꞋ ameꞋ nimanimi luꞋwami endilisi ma nif amaeꞋ.’

25 EaꞋ Abraham naꞋipana naꞋi, ‘Nogalome, ineꞋ okom nondandaꞋma fowaꞋ ataꞋ nape naminai etap anaeꞋ nefaꞋ amamaga buꞋwami atom. EaꞋ Lasarus nofaꞋ amamaga hiami awami. EaꞋ deiꞋ wambel anaꞋe opaf ananinai nape boꞋona, eaꞋ ineꞋ nefaꞋ nimanimi luꞋwami. 26 EaꞋ anom amamaga wapotiꞋ mape. LaꞋafena apeꞋ maloma ipeꞋ God nandaꞋ anona kwambiwag luꞋunai. NaꞋama epes sape naꞋae ma saꞋi sotopaꞋ kwambiwag anama seafoꞋo ma ipeꞋ, esis ina laꞋifis. EaꞋ epes sapani naꞋamai, esis ina laꞋifisa sotopaꞋi kwambiwag siefiꞋmai apeꞋ, owaꞋetin.’

27 EaꞋ aman anama naꞋi, ‘Ahalome, aeꞋ aꞋi ineꞋ nesapaꞋo Lasarus notanima nofoꞋo ipat ahalome aeꞋanai. 28 AeꞋ anom owape wanom biam mape. Ama Lasarus niꞋipama basef laꞋifimi ma momboma opalef. NaꞋama amam wapotiꞋ mufiꞋi wambel anaeꞋ mofaꞋ nimanimi luꞋwami.’

29 EaꞋ Abraham naꞋipana naꞋi, ‘OwaꞋ. Owapena ineꞋimi momeꞋago basefa Moses noloma amam profet migiambamam. Amam momeꞋago basef amama.’

30 EaꞋ naꞋipana naꞋi, ‘Ahalome Abraham, owaꞋetin. Ina nambimb momeꞋam, owaꞋ. EaꞋ iꞋi enin epen nagaꞋi nehafel hiꞋagif nefeꞋma amam, nambimb memeꞋana momboma opalef.’

31 EaꞋ Abraham naꞋipana naꞋi, ‘OwaꞋetina meameꞋ basefa Moses noloma amam profeti, eaꞋ nambimb enin epen nagaꞋi nitanima nehafel hiꞋagif, amam ina mombaleꞋefana wapotiꞋ, owaꞋ.’ ”